CEBU, Philippines - Ang gidudahang usa sa mga tulisan sa baybayon sa dakbayan sa Talisay nadakpan sa kapolisan sa maong dakbayan didto sa barangay Cansojong, Talisay kagahapon sa buntag.
Ang nagtingkagol na karon sa Talisay City detention cell mao si Joebert Covilla alyas “Obet”, 23, nga taga Cansojong.
Nasakmit usab sa kapolisan ang .38 kalibre nga revolver ni Covilla uban sa duha ka buhing bala niini.
Ang suspetsado nasakpan nila ni PO3 Rey Bucao, PO2 Roy Lofranco ug PO2 Erwin Denila nga nagtangkil og armas samtang naghayang-hayang kini sa usa ka lantay sa maong lugar.
Gumikan kay ang pagtangkil og armas usa dakong supak sa Comelec gun ban, gisikop dayon ang suspetsado ug gibalhog sa prisohan.
Si PO2 Lofranco mibutyag sa Banat News nga si Covilla usa sa mga suspek nga manulis sa mga mosuroy sa beach o baybayon sa Cansojong ug gani gipasakaan kini og kaso sa korte sa usa sa iyang nabiktima sayo niining tuiga. – BANAT NEWS