Dugang polis, sundalo gipadala sa Daanbantayan

CEBU, Philippines - Gumikan sa gikabalak-ang tensyon o kagubot nga motumaw tungod sa bag-ong desisyon sa Comelec First Division ug ang giingong paglingkod ni Engr. Augusto Corro pagkamayor sa lungsod sa Daanbantayan ug bise mayor niining si Jose de Leon diha sa munisipyo mipadala na og dugang pwersa ang kapolisan ug militar.

Si Corro kagahapon sa gihimong press conference mipahibalong mahimo na silang makalingkod sa pwesto human ibasura sa Comelec First Division ang petition for certiorari nila ni Mayor Sun Shimura ug Vice Mayor Maria Luisa Loot kabahin sa desisyon sa RTC Court nga nag-ingong midaog sila si Corro ug de Leon.

Ang Comelec First Division mi-reaffirm usab sa nahaunang desisyon sa lower court nga nagdeklarar nila ni Corro ug de Leon nga maoy mananaog gyud sa nakalabay'ng 2007 batok ni Shimura ug Loot sa pagkamayor ug bise mayor sa Daanbantayan.

Apan si Shimura sa pakighinabi sa Banat News sa telepono mipadayag nga nagdali-dali lang ang kampo ni Corro nga makalingkod sa posisyon bisan wala pay writ of execution.

“Ang makapatangtang namo writ of execution from Comelec en banc. Kun ilaha nang buhaton (mosulong sa munisipyo) dako gyud ning gubot kay dili man sad ta mohawa niining dapita,” matud pang Shimura.

Matud pa sa mayor nga dunay gibana-banang 3,000 ka mga supporters nilang nangandam nga mobarikada sa munisipyo kun gikinahanglan nga naglakip sa mga barangay officials ug kawani sa munisipyo.

Sumala pang Shimura nga legal battle ang kasamtangang sitwasyon ug may mga proseso niini. Matud pa niya duna pa silay lima ka adlaw nga tagal aron makapasaka og motion for reconsideration sa bag-uhay nga desisyon sa Comelec First Division. Matud pang Shimura nga nasayod ang mga taga Daanbantayan kun si kinsa maoy tinuuray nga nakadaog, andam usab silang mokanaog sa malinawong paagi kun ipaagi usab sa hustong proseso.

Gipaabot karong adlawa nga motaas ang tension sanglit dunay gikatakdang Santos nga Misa nga ipahigayon ang kampo ni Corro ug giingong pagkahuman momartsa padulong sa munisipyo.

Gipasalig hinuon ni Shimura nga dili niya did-an ang kampo ni Corro nga makaparada o rally basta dili lang momugna og kasamok ug kahasol sa mga motorista ingon man sa munisipyo.

Gisuwayan pagtawag sa Banat News ang telepono ni Corro apan dili kini makontak.

Si Cebu Provincial Police Director, Sr. Supt, Erson Digal mitug-an sa Banat News nga gitugutan na ni Police Regional Office-7 director Chief Supt. Lani-O Nerez nga mopadala og duha ka teams sa Special Reaction Unit.

Samtang si Lt. Col. Raymundo Bañares sa 78th Infantry Battalion mopadala usab og dugang usa ka platoon nga mga sundalo aron moabag pag-secure sa kapolisan sa munisipyo ug pagmentinar sa kahapsay ug kalinaw sa lungsod.  –  BANAT NEWS