LAMDOA Drivers nabalaka sa new terminal

CEBU, Philippines - Mga drayber sa mga pasaheroan nabalakang maapektahan ang kinitaan tungod sa pagbalhin kanila sa bag-ong terminal sa dalan Punta Rizal sa barangay Pajo sa dakbayan sa Lapulapu tungod sa pag-renovate sa karaan nilang terminal.

Si Rufo Piloton, presidente sa Lapulapu Mandaue Driver and Operator Association (LAMDOA) nga nahinabi sa Banat News mipadayag nga nagnihit kaayo ang mga pasahero sa ilang gibalhinang bag-ong terminal.

Ang maong terminal atua sa hilit nga lugar ug ang mga pasahero dili naman mohapit sa terminal aron manakay ug kun molungtad pa kini og dugay hayan mosamot kaut-ot ang ilang kinitaan. Ang ilang mga sakyanan magbiyahian paingon sa dakbayan sa Sugbo ug dakbayan sa Mandaue.

Si Piloton miingon nga nagbayad sila og P5 nga arkabala sa matag larga gikan sa bag-ong terminal apan ang nakapait kay wala sila masayod og kasiguroan kun hangtod kanus-a ang ilang pagpabilin sa pag-parking sa maong dapit.

Nagtinguha si Piloton pagkuha og kasayuran sa ilang gibayad nga P5 sa matag larga kun gigamit ba alang sa pagpalambo sa parkingan tungod dugay nang katuigan silang nagbayad niini.

Si Roldan Fuentes nga maoy lider sa mga dispatchers miingon nga lakip sila nga mga dispatcher ang naapektuhan usab sa ilang panginabuhi kay dili na man sila tugotan nga makasulod sa terminal.

Gitataw ni Fuentes nga nakatampo sila sa pagbaton og kahapsay sa matag biyahe sa PUJ gikan sa terminal sanglit silang mga dispatcher mao man ang mopahimutang sa mga sakyanan pinaagi sa pag-eskedyol sa matag biyahe niini. - Romeo Limpangog (BANAT NEWS)