CEBU, Philippines - Police Center for Aviation Security kon PCAS-7 pormal nang mipasaka og kasong kalapasan sa Akta Republika 8294 ubos sa Comelec gun ban ug smuggling sa usa ka tawong mipadala og tulo ka armas nga gisulod sa tangke sa motorsiklo diha sa tugpahanan sa Mactan Cebu International Airport sa milabay’ng mga adlaw.
Si PCAS-7 chief, Sr. Supt. Joselito Salido mipadayag nga ila nang napasaka ang kaso batok sa suspetsado (wala hinganli) ngadto sa piskaliya sa dakbayan sa Lapulapu kinsa maoy nagpadala sa maong mga armas nga gisulod sa tangke sa motorsiklo ug gipadala kini pinaagi sa Philippine Postal Office apan nasakpan sa Philippine Airlines cargo section sa dihang nakita sa x-ray machine ang mga armas niadtong Enero 13, 2010.
Matud pa ni Salido ila unang gipugngan ang ngalan sa suspetsado gumikan sa ilang gihimong hot pursuit operation.
Kahinumduman nga duha ka kalibre .38 ug usa ka kalibre .22 gisulod kini sa tangke sa usa ka motorsiklo pinaagi sa paggisi sa kilid sa tangke ug pag-welding niini og balik aron dili mamatikdan.
Ang gipadad-an sa maong armas mao ang usa ka F. Cabero nga residente sa Mabini St. sa San Fernando, La Union.
Samtang sa pagsuwat ning balita padayon pang gipangita ang mipadala niini. - Bong Soriano (BANAT NEWS)