CEBU, Philippines - Nangangkon si Bokal Agnes Magpale, chairwoman sa committee on women, families and minors nga nakahatag gyud og leksyon sa mga Sugbuanon ang pagpatuman sa ordinansa sa lalawigan nga nagdili sa mga malaw-ayng pasundayag ilabi na sa kababayen-an.
Kahinumduman nga gipasakaan og kaso ni Gov. Gwendolyn Garcia tungod sa paglapas sa Women Development Code of Cebu, Article 201 of the Revised Penal Code ang duha ka sexy actress nga sila si Maui Taylor ug Jennifer Lee, actor Paulo Paraiso ug ingon man ang mga organizers sa bikini open nga gipahigayon sa lungsod sa Santa Fe sa isla sa Bantayan sa milabay’ng tuig.
Matud pang Magpale, sukad mapasakai og kaso ang maong mga aktres ug actor nahunong na ang susamang mga palabas. Ang ordinansa nagprotiher sa dignidad ug moralidad sa kababayen-an ug dili isipon nga object sa kalingawan sa publiko.
Sumala pa ni Magpale nga may pipila ka mga grupo sa mga kababayen-ang miduol kaniya ug nagpasalamat sa gihimo niyang ordinansa. Nagtuo si Magpale nga ang mga tigpasiugda og mga events ilabina panahon sa kapistahan sa lungsod dinhi sa Sugbu maglikay na nga mahisusama sa maong mga gipangkiha.
Lakip sa gipasakaan og kaso sa gobernadora mao si Eugene Elton Tiu, Asuncion Celia Floro ug Rommel Salomon nga organizer sa Pump 'N Summer sa Santa Fe, sila usab mihunong na sa maong matang sa kalingawan sumala pang Magpale.
Samtang ang laing gikiha sa gobernadora nga si Mercury Gumera, ang choreographer sa maong events mitug-an nga ang kauban niining mga choreographers nagdumili sa pagdawat og trabahong bikini open bisan pa man sa sulod sa pribado ug siradong lugar.
Hinuon ang mga gipasakaan og kaso gipasaylo na sa gobernador apan magpabilin ang kaso hangtud nga di sila motuman sa ilang gipanaad nga tabangan ang lalawigan sa pag-promote niini ug sa pagsigurong proteksyunan ang dignidad ug moralidad sa kababayen-an. – BANAT NEWS