Manhunt vs 3 gun-for-hire

CEBU, Philippines - Mga chief of police sa kalungsuran ug components city sa lalawigan sa Sugbu gimandoan na paghimo og manhunt operation batok sa laing tulo pa ka mga suspetsado sa pagpatay sa magtutudlong si Romeo Duran sa Binlod Elementary School lungsod sa Argao.

Si Sr. Supt. Erson Digal, director sa Cebu Provincial Police Office mimando niini human madakpi ang drayber sa gunman kinsa napasakaan na og kaso nga si Joel Alforque.

Ang gi-manhunt karon mao sila si Arnel Cabungcal nga maoy giingong gunman ug mga lookouts niining sila si Jeffrey Cavan ug Marcelo Navalez.

Si Digal miingon nga duna siya'y giumol nga special operation team nga maoy padayong naggukod sa tulo kaabag sa special investigation team samtang ang mga police stations sa probinsya moabag usab niini.

Gipakatap na sa tanang police stations ang mga hulagway sa tulo samtang nagpaabot sila sa warrant of arrest batok kanila. Gitinguha sa kapolisan nga madakpan ang tulo ug masuta ang motibo ug ang mastermind sa krimen.

Nagtoo silang wala pa makabiya ang mga suspetsado sa Sugbu nga giingong mga guns-for-hire. Si Cabungcal alyas Kimpang ilado kaayo diha sa Carcar nga gun-for-hire ug base sa impormasyong ilang nakuha modawat lang kini’g P1500, P2000 ngadto sa P3000 mil nga bayad matag target.

“Siga-siga gyud ni siya sa ilang lugar ug mahadlok ang mga tawo niini walay motestigos sa ubang krimen batok kang Kimpang pero kun malutsan na ni og warrant dali nalang unya kaayo sa kapulisan sa pagsignit niini,” matud pang Digal.

Nasuta usab nga human sa pagpamusil yano ra kaayong nagpadagan sa ilang motorsiklo ang mga gikatahapan maong daghang nakakita sa ilang mga dagway. - BANAT NEWS