CEBU, Philippines - Unom sa siyam ka mga tawong nasikop atol sa saturation drive nga gilusad sa kapolisan sa miaging gabii didto sa barangay Kamagayan ning dakbayan sa Sugbo, nasakmitan og nubain ug upat ka gambling machine.
Ang mga nasikop nga nagluklok og nubain sa mga sakop sa Investigation and Detective Management Branch (IDMB) mao sila si Galileo Gealon, 31, nga taga barangay Lahug, Jona Pansacala, 33, taga barangay Talamban, Rey Carlos Moreno, 26, taga dalan Carlock, Rodolfo Lumagda, 32, taga C. Padilla, Jonas Gabutin, 21, taga barangay Guadalupe ug Francis Jake Enriquez, 24, taga barangay Cabreros.
Samtang ang tulo nga nasikop gumikan sa kasong vagrancy nailhan nga sila si Elvin Molina, 36, taga barangay Tisa, Clorer Villarta, 29, taga barangay Basak syudad sa Lapu-Lapu ug Jelly Bacalso, 31 taga White Road Inayawan.
Gilusad sa IDMB ang maong saturation drive batok sa tanang klase nga krimen ning dakbayan nga gikatahong nagkagrabi na karong panahona diha sa Kamagayan.
Sa pagkakaron ang tanang nadakpan nagtingkagol na sa prisohan sa Cebu City Police Office samtang nagpaabot pa sa kasong ipasaka batok kanila.
Samtang ang duha ka video karera machine ug duha ka Mole-mole gitipon sa mga kapolisan sa mga daobanang makina nga sugalan. - Lesley Caminade (BANAT NEWS)