Ex-convict gipatay

CEBU, Philippines - Gipusil patay samtang natulog sa lantay ang usa ka ex-convict nga bag-ohay pang nakagawas sa bilanggoan samtang natulog gawas sa iyang pinuy-anan sa sitio Baraca Poblacion-III siyudad sa Carcar niadtong Lunes sa alas 4:00 sa kaadlawon.

Ang biktima nga patay nang naabot sa tambalanan mao si Helarion Llanos, 36, molupyo sa nahisgutang lugar ug bag-ohay pang nakagawas sa bilanggoan sa kasong murder.

Matud ni SPO1 Joel Pananganan sa Carcar City Police dihang nahinabi sa Banat News usa ka wala mailhing lalaki ang miduol sa gihigdaan sa biktima dayong pusil niini ug daling miikyas.

Ang mga silingan ni Llanos nakadungog og lanog nga buto sa armas daling misusi sa dapit ug nakakitang nagkadugo na ang biktima diha sa lantay maong ilaha kining gidala sa Carcar District Hospital apan gideklarar kining dead on arrival.

Sumala pang Pananganan usa ka buwan palang gikan nakagawas sa bilanggoan si Llanos ug mao kini karo’y sentro sa motibong ilang gisubay tungod kay nagtuo silang posibleng gipanimaslan ang biktima.  (BANATNEWS)