CEBU, Philippines - Nabatyagan na sa mga mag-uuma ug mananagat sa Sugbu ang pag-igo sa grabeng huwaw dala sa El Niño phenomenon tungod sa nakitang pagkahubas sa pipila ka tubod nga kakuhaan og tubig ug ang pagkamatay sa mga pananom.
Sa report sa ABS-CBN Central Visayas, si Sudlon Dos barangay Kapitan Presilo Albores mibutyag nga naapektahan na ang mga sitio sa iyang barangay tungod sa huwaw.
Ang mga residente sa bukirong barangay sa dakbayan nagsalig sa pananom og utanon ug buwak apan gumikan sa huwaw nangalawos na ang uban nilang pananom gumikan usab sa kakulang sa ulan ug ikabubo nga tubig.
Matud pa sa report nga ang mga mag-uuma niadto pang bulan sa Nobiyembre sa milabay'ng tuig nakasinati sa huwaw, ang Pag-asa sa linaing report mipahibalong posibleng masinati kutob pa karong Hunyo ang kainit.
Gawas sa kainit gipaabot nga masinati usab ang pagmenus pa sa suplay sa tubig.
Samtang bisan ang mga mananagat sa Talisay nabalaka na usab nga momenus o ba kaha mangamatay ang mga semilyang isda sa kadagatan gumikan sa pag-init sa temperatura sa tubig sa dagat.
Si Dr. Allan Poquita, ang assistant regional director sa Bureau of Fisheries and Aquatic Resources sa susamang report miangkon kun molapas na sa 35 degrees centigrade ang temperatura sa tubig sa dagat mangamatay gyud ang mga isda, sumala pa niini normal nga temperatura moabot lang og 33 degrees centigrade.
Ang pagsaka sa temperatura mao usab ang gitumbok nga hinungdan sa pagdaghan sa red algae nga nagdala og gitawag nga red tide nga makahilo sa tawo kun mataptan ang isdang makaon sa tawo . (BANATNEWS)