AFP non-partisan gyud

CEBU, Philippines - Subling gipahinumduman sa kadagkuan sa militar ang mga sakop nga dili mag-apil- apil sa kalihukan sa politika nunot sa nagsingabot nga eleksyon karong Mayo niining tuiga.

Kini maoy pahinumdom ni Central Command Commander Major General Ralph Villanueva atol sa pagbisita niini sa nagkadaiyang kampo ilawom sa iyang hurisdiksyon.

“Ang rason niini mao ang pagseguro nga malayo ang AFP sa mga partisan politics ug nakabutang usab sa 1987 Constitution nga wala'y miyembro sa kasundaluhan nga mag-apil-apil sa bisan unsang kalihukang politika gawas ra gyud ang pagbotar,” matud pa ni Villanueva. 

Si Maj. Gen. Villanueva bag-ohay lang mibisita sa 20th Infantry Battalion sa Tinambacan District, Calbayog City, Western Samar ug sa headquarters, 803rd Infantry Brigade, Camp Sumoroy, Catarman, Northern Samar sa milabay'ng Lunes ug Martes, Pebrero 08 ug 09, 2010. 

Iyang gipahinumduman ang mga sakop nga bisan adunay direktiba ang Comelec sa tahas sa kasundaluhan karong eleksyon ubos sa Comelec Resolution 8714 magpabilin nga propesyonal ug walay dapigang politiko ang mga sundalo. – BANAT NEWS