Babayeng gi-salvage sa Talisay nailhan na

CEBU, Philippines - Babayeng natusak sa dinunggaban nga napalgang patay diha sa sitio Tabok Sapa, barangay Camp 3, dakbayan sa Talisay nailhan na niadtong Biyernes apan ang kapolisan blangko pa gihapon ang imbestigasyon.

Si PO3 Mikie Espina sa pakighinabi sa Banat News mibutyag nga giila ang biktima mao si Madonna Vito, 17-anyos lumad nga taga barangay Ondol, lungsod sa Inabanga, Bohol kinsa naabot nganhi sa Sugbo sa milabay'ng upat ka buwan ug nagtrabaho isip katabang.

Matud ni Espina nga ang mga ginikanan ni Vito nga sila si Cepriano ug Gondillina uban sa ilang mga paryenteng mianhi sa Sugbo niadtong Biyernes maoy miila niini diha sa Saint Francis Funeral Homes.

Ang mga paryente ni Vito nakadungog ug nakakita sa balita sa radyo ug telebisyon kabahin sa gidangatan niini.

Si Espina nagkanayon nga sulod na sa duha ka buwan si Vito nga walay contact sa iyang mga ginikanan ug paryente maong gibati sila niini og kabalaka.

Si Espina mibutyag usab nga unang nangamo si Vito diha sa Deca Homes sa lungsod sa Minglanilla apan wala kini magdugay sulod lang sa duha ka buwan ug mibalhin ngadto sa laing amo hangtud nga naabot kini diha sa Tabunok niining ulahi lang.

Si Espina midugang nga base usab sa ilang nadawat nga impormasyon si Vito dunay pagkabadlungon nga maoy hinungdan nga dili magdugay sa giamohan. – BANAT NEWS