'Kawatan' namusil, napusilan sad

CEBU, Philippines - Napusilan sa mga mirespondeng polis ang usa ka gidudahang kawatan nga nakapusil sa usa ka tanod dihang kini gisitar sa naulahi nga nagpatrolya nianang tungura diha sa eskina sa Country Drive ug Tres de Abril sa barangay Punta Princesa kagahapon sa kaadlawon.

Ang napusilan ug nadangat sa tambalanan giilang si Renato “Rene” dela Cruz alyas Felipe Lanoria, 36, kinsa napusilan sa duha ka bitiis samtang gipangita pa ang kauban niining giila sa pangalang Jun-jun Ceballes pulos taga barangay Ermita.

Samtang naangol usab ang barangay tanod nga si Mario Nies Parangan,29, residente sa barangay Punta Princesa kinsa nakaangkon og samad pinusilan sa suwang ug tuong bahin sa lawas ug nadangat sa Cebu City Medical Center.

Sa imbestigasyon sa Cebu City Police Office Homicide Section giingong nagpahigayon og roving patrol ang mga barangay tanod sa Punta Princesa sa lugar dihang nasigpatan si dela Cruz ug Ceballes nga nagbisekleta ug may gibitbit nga bolt cutter.

Tungod sa pagdudang posibleng kawatan ang duha ilaha kining gisitar ug gipahunong apan kalit nga mibunot og armas ang duha dayong pusil ngadto sa mga tanod. Human sa pagpamusil, ang mga suspek daling misibat padulong sa Atillo Compound sa nahisgutang lugar.

Ang mga tanod daling nagpatabang sa usa ka miyembro sa Special Weapons and Tactics nga si PO2 Edcel Delgado Petecio nga nagpuyo usab sa maong barangay ug mipahigayon og hot pursuit operation diha sa Atillo Compound ug diha nila ma-corner ang duha.

Apan imbes nga motahan sa kaugalingon subling misukol ang duha ug mition sa ilang mga armas sa mga tanod ug ni PO2 Petecio hinungdan nga giunhan kini sa maong polis og pusil.

Si dela Cruz naigo sa iyang duha ka bitiis samtang ang kauban niini misutoy og dagan ug wala na maapsi.

Nakuha gikan sa mga kamot ni dela Cruz ang usa ka kalibre .38 rebolber nga adunay sulod nga upat ka buhing bala ug duha ka kabhang lakip na ang bisekleta ug usa ka bolt cutter. – BANAT NEWS