Kutsilyo nagtaop sa patay

CEBU, Philippines - Usa ka patay’ng lawas sa lalaki nga may nag-ungot nga kutsilyo sa lawas ang napalgan diha sa dalan FF Cruz sa North Reclamation Area sa barangay Subangdaku, dakbayan sa Mandaue alas-5 ang takna sa miaging hapon.

Si PO2 Leoncio Canoy sa Presinto 2 nga nahinabi sa Banat News miingon nga gibanabanang 20-anyos kapin ang pangidaron, kasarangan ang gidak-on sa panglawas ug nagsul-ob og purol apan walay sapot sa itaas ug gibana-banang 5’ 2” ngadto sa 5’3” ang pamarog niini.

Matud pa ni Canoy usa ka tawong nanguha og tangkong sa bakanteng luna sa maong dapit maoy nakakita sa patay’ng lawas nga nagbuy-od sa maong dapit.

Gituohan sa kapolisan nga gipatay sa laing dapit ang biktima ug anha lang gilabay, giingong pipila ka tawo ang mibutyag nga nakakita og duha ka sakyanan sa sayo sa udto sa maong adlaw.

Ang patay’ng lawas naa karon sa Cosmopolitan Funeral Homes sa dakbayan sa Mandaue.   (Romeo Limpangog)   (BANATNEWS)