CEBU, Philippines - Naalarma ang kadagkuan sa Land Transportation Office (LTO) sa resulta sa ilang gipahigayong surprised random drug testing kagahapong adlawa sa North Reclamation Area.
Kini tungod kay sulod sa 50 ka mga drayber nga ilang gipaubos sa urine test adunay lima nga napositibong tiggamitan og illegal nga drugas.
Ang lima ka drayber nga nagpositibo sa ginadiling drogas nagbiyahian sa lungsod sa Consolacion, Carmen ug Lilo-an.
Matud pa ni LTO assistant secretary Arturo Lomibao nga misaksi sa drug testing kini nabalaka sa kaluwasan sa mga pasahero kini tungod kay kini nangahulugang 10 porsiyento sa mga drayber naa ilawom sa impluwensya sa illegal nga drugas samtang namasahero.
“This is an alarming already,” pasabot pa ni Lomibao.
Dugang pa ni Lomibao nga sa miaging tuig, 48 porsiyento sa mga kaso sa reckless driving ug disgrasya migawas sa test nga tiggamitan og ilegal nga drugas ang nalambigit nga mga drayber.
Butyag usab ni Lomibao nga nagkaanam og kataas ang mga kaso sa reckless driving matag tuig ug sagad sa hinungdan wrong turning, over speeding ug overtaking.
“Imbes na sana bumaba ang mga road accidents parang tumaas na siya every year kaya nandito ang Citizens Charter para makatulong sa pagbaba sa disgrasya,” pasabot pa ni Lomibao.
Samtang sa laing bahin, si Regional Director Raul Aguilos sa iyang bahin nagkanayon nga ang mga drayber nga nagpositibo gikumpiskahan dayon sa ilang mga lisensya ug girekomendar isulod sa drug rehabilitation.
Dugang pa ni Aguilos nga unya na nila ibalik ang mga drivers license kun makapresentar sila og dokumento magpamatuod nga napaubos na sila sa drug rehabilitation.
“Ako na silang giingnan nga pangita nalang mo (drivers) og laing trabaho kun dili mo gustong magpa-ubos sa rehabilitation,” pasabot pa ni Aguilos
Si Dangerous Drug Board acting Secretary Paul Clarence Oaminal sa pakighinabi sa Banat News nanghinaot nga mahatagan sila og record sa mga drayber nga nasakpan sa LTO nga tiggamitan og ginadiling drugas. Kini aron ilang matabangan nga masulod sa rehabilitation centers.
“Aduna bay nagpositibo sa mga tawong nagkuha og lisensya sa dihang gipaubos ni nila sa drug test? Di ba wala man?” pangutana pa ni Oaminal kabahin sa rekisitos nga drug testing una pa makakuha o maka-renew og lisensya ang mga drayber.
Gihangyo ni Oaminal ang LTO nga may koordinasyon sa DDB ang susamang random drug testing aron usab sila makatabang sa maong problema pagpangita og solusyon. – BANAT NEWS