Jamming devices di kapugngan

CEBU, Philippines - Dili mapugngan sa Bureau of Customs ang mga piyesa sa jamming equipment nga moabot dinhi sa nasud.

Kini ang pagpasabot ni Customs Commissioner Napoleon Morales atol sa iyang pagbisita dinhi sa Port of Cebu kagahapon.

Matud pa ni Morales padayon ang ilang pagsusi sa mga jamming devices nga nia sa nasud diin iyang gitahasan ang iyang mga operatiba sa intelligence ug enforcement sa pag-monitor sa mga tindahan nga namaligya sa maong mga ekipo.

Matud pa ni Morales kun masuta nga dunay tindahan nga namaligya niini pangitaan kini sa Customs og permit o clearance gikan sa National Telecommunications Commission kun legal ba ang pagsulod niini sa nasud ug kun mapakyas kini sa pagpakita sa maong mga dokumento ila kining konpiskahon.

Samtang giklaro usab ni Morales nga dili sila makakompiskar sa mga accessories sa mga jamming devices nga nia na sa nasud gumikan kay dili supak sa balaod ang pag-import sa mga piyesa sa electronic devices ilabi na kung nagbayad kini sa insaktong buhis. - Bong Soriano (BANAT NEWS)