P6.2-milyones peke Marlboro gidugmok sa BOC

CEBU, Philippines - Gipangunayan ni Bureau of Customs Commissioner Napoleon Morales ug Cebu Customs District Collector Ronnie Silvestre ang pagdugmok sa mokabat P6.2 milyones nga sigarilyong gipalusot dinhi sa Sugbo sa milabay’ng tuig 2009.

Mga 1,482,000 ka sticks sa tulo ka flavor nga sigarilyong Marlboro nga gigama sa Estados Unidos gipanglunod kagahapon sa galingan nga personal nga gipakita ni Morales ug Silvestre sa mga sakop sa media. Gihimo kini sa holding area sa Cebu International Port (CIP).

Matud pa ni Morales nga ang maong shipment sa pinayuhot nga sigarilyo gikan sa Amerika makahatag og kadaot sa panglawas sa tawo hinungdan nga ila kining gidugmok.

Samtang si Sivestre mipadayag nga adunay igong basehanan sa pagdugmok sa maong mga sigarilyo gumikan sa kalapasan nga nahimo sa nagpayuhot niini ubos sa Section 2609 ug Section 3519 sa Tariff and Customs Code of the Philippines ug base sa inspeksiyon sa National Tobacco Administration, dili kini angayang ibaligya sa publiko.

Si Silvestre miingon nga ang pagdugmok mensahe kini ngadto sa mga smugglers og sigarilyo nga seryoso karon ang kampanya sa Customs Cebu sa mga pagpalusot ug wala sila’y santohon kun masikop sa mga operatiba sa adwana.

Ang usa ka container van sa mga pekeng sigarilyo nga Marlboro miabot dinhi sa Sugbo sa CIP niadtong Marso 2, 2009 gikan sa Amerika luwan sa MV Elena ug nasuta nga usa ka “misdeclared items” hinungdan nga giluwatan kini og warrant of seizure and detention ni kanhi Cebu Customs District Collector Ricardo Belmonte.

Sa dihang gihimo ang series of hearing sa maong kaso, nahukman nga embargohon kini pabor sa gobyerno niadtong Enero 15, 2010. Si Silvestre mihukom nga ipadayon ang pagdugmok sa mga sigarilyo atol sa pagbisita ni Morales kagahapon dinhi sa Sugbo aron makigtagbo sa mga broker, forwarder ug ubang stakeholder sa adwana. – BANAT NEWS