Mga lider ni Noynoy, Mar nagmaya na

CEBU, Philippines - Nangangkon na og sayong kadaugan ang mga lokal nga lider nila ni Senador Benigno Noynoy Aquino ug runningmate niini nga si Sen. Mar Roxas sa lungsod sa Tabuelan niining pipila palang ka mga adlaw sa pormal nga pagsugod sa nasudnong kampanya alang sa nagsingabot nga eleksiyon karung bulan sa Mayo.

Ang mga lider sa Liberal pinangulohan ni Teting Gallo, kandidato pagkamayor sa maong lungsod uban sa runningmate niining si Bhebs Zamora mipadayag nga mahinangpon kaayong gidawat ang panagpares nila ni Aquino ug Roxas sa mga residente sa ilang pagpangunsulta sa kabarangayan.

Gituohan ni Zamora atol sa interview sa DyDD nga epekto kini sa “Cory magic” ug maoy magtuboy sa kadaugan nila ni Aquino ug Roxas ug tanang mga kandidato sa Liberal Party (LP).

Gidugang ni Zamora nga bisan ang tandem nila ni LP Gobernatorial beat Hilario “Junjun” Davide III ug Bise Gobernador Gregorio Sanchez Jr., init usab kaayong gidawat sa mga molupyo sa ilang lugar.

 Matud pa niini gipul-an na ang mga molupyo sa ilang lungsod sa kasamtangang nagdumala nga walay mga nahimong proyekto sulod sa dugay nang mga katuigan pagdumala nila sa lungsod. – BANAT NEWS