CPPO manaob sa marijuana ugma

CEBU, Philippines - Ang Cebu Provincial Police Office (CPPO) gitakdang manaob sa 200 ka mga punuan sa marijuana nga ilang linarot ug moguba usab sa 31 ka mga video karera machine nga ilang sinakmit gikan sa nagkalainlaing lugar sa lalawigan ugmang adlawa.

Mao kini gibutyag kagahapon ni Sr. Supt. Erson Digal , hepe sa CPPO kinsa nagkanayon nga gikasabutan na niya ug ni Gobernador Gwen Garcia nga ang mga sensiyo nga makuha nila gikan sa mga video karera nga ilang gub-on idonar kini ngadto sa mga foundation nga nagkinahanglan og tabang.

Matud pa ni Digal nga ang mga marijuana ug video karera nasakmit nila sa miagi pang tuig gikan sa mga kalungsoran ning lalawigan.

Sa samang higayon nasuta usab ni Digal nga wala mangawagtang ang mga   central processing unit (CPU) sa mga video karera nga ilang daobanan base sa gihimong pakisusi sa Provincial Anti-Illegal Drugs Special Operation (PAIDSOT) ug Provincial Investigation Branch (PIB). - BANAT NEWS