Tomboy giluba sa kapuyo

CEBU, Philippines - Gumikan sa kapungot, giunay pagdunggab sa usa ka dalaga ang kapuyo niyang tomboy didto sa barangay Tabunok, dakbayan sa Talisay niadtong Lunes sa hapon.

Ang suspetsado mao si Myra Cabuhal, 38, nga taga sitio Molave sa nahisgutang barangay, samtang ang biktima mao si Norma Agustin, 37, nga ka-live-in sa suspetsado.

Si PO2 Lino Diez, jailer sa Talisay detention cell mibutyag sa Banat News kagahapon nga sigon sa giasoy kaniya sa suspetsado, kini nagkanayon nga sa wala pa mahitabo ang insidente siya ug si Agustin, uban sa barkada usab nilang tomboy kansang ngalan wala niini ibutyag, ug may usa pa ka lalaki nag-inom sa sulod sa merkado sa Tabunok.

Human sa ilang inom ,si Agustin buot untang mokuyog sa higala niining tomboy, apan gipugngan kini ni Cabuhal kay gidala man niini ang kwarta nga halin sa ilang tindahan.

 Apan ang higalang tomboy ni Agustin mao man hinuon ang nasuko ug gikalitan og sumbag niini si Cabuhal busa nagharong sila.

Samtang si Agustin imbis adto molaban kang Cabuhal, didto man hinuon modapig sa tomboy niining higala, hinungdan nga iya kining gihansakan sa iyang kutsilyo. - Brenda D. Batuto (BANAT NEWS)