Nagpabuto sa armas natiklo

CEBU, Philippines - Usa ka ulitawo kinsa nagpabuto sa iyang armas de fuego didto sa sitio Ylaya, barangay Ibabao, lungsod sa Cordova, nadakpan sa kapolisan sa maong dapit sa miaging gabii.

Ang suspetsado mao si Jeffrey Torregosa Olandria, 19, ulitawo nga lumad nga taga Buenavista, Bohol apan temporaryong nagpuyo karon sa Cordova.

Si PO3 Calixto Botantan sa kapolisan sa nahisgotang lungsod mibutyag sa Banat News nga hubog sa bino ang suspetsado nga nagdala og armas, ug kalit lamang kining mipasalba.

Unya ang mga silingan nga nakadungog sa maong buto, puwerting kurata hinungdan nga nanawag kini sa ilang buhatan sa kapolisan ug mireklamo sa gibuhat ni Olandria.

Matud pa ni PO3 Botantan nga dihadiha miresponde dayon sila ug naabtan gyud nila ang suspetsado nga didto pa sa maong lugar.

Nasakmit nila ang .38 kalibre nga snub nose revolver niini uban sa duha ka buhing bala ug pipila ka mga kabhang niini.

Nasuta sa kapolisan nga walay lisensya ang maong hinagiban busa gibalhog dayon nila ang suspetsado sa prisohan.    (Romeo T. Limpangog)   (BANATNEWS)