CEBU, Philippines - Duha ang namatay samtang duha usab ang naangol sa dihang misaliring ang ilang gisakyang motorsiklo duol sa tulay sa South Road Properties (SRP) habig sa barangay San Isidro, dakbayan sa Talisay kagahapon sa alas 4:10 sa kaadlawon.
Si SPO4 Henry Obiso, ang hepe sa Talisay City Traffic Division miila sa nakalas nga sila si Kinkin Reponte ug Roldan Repolido, pulos 21-anyos, managsilingan sa barangay Cayam, dakbayan sa Naga.
Samtang ang mga naangol mao usab sila si Edmund Bucao, 23, ug Calvin Gabiana, 25, silingan ra usab sa nangakalas.
Matud pa ni Obiso nga si Reponte maoy nabugtoan dayon sa kinabuhi samtang si Repolido dead on arrival (DOA) pag-abot sa Talisay District Hospital.
Si Obiso mibutyag sa Banat News nga ang upat, luwan sa usa ka motorsiklong gimaneho ni Bucao gikan sa barangay Tanke, dakbayan sa Talisay paingon sa dakbayan sa Naga.
Gituohang kusog ang dagan sa motorsiklo ug nawagtangan og control si Bucao hinungdan sa pagsaliring niini bisan walay kaengkwentro sa dalan, ang mga sakay pulos nangalagpot sa sementadong dalan. Matud pa ni Obiso nga posibleng nangapantok pag-ayo ang ulo nila ni Reponte ug Repolido sa karsada nga maoy hinungdan sa hinanali nilang kamatayon.
Samtang sila si Bucao ug Gabiana igo lang nangapangos ug nangabun-og ang kalawasan.
Nakadawat usab og taho ang kapolisan nga nanag-inom pa sa barangay Tabunok gikan sa Tanke ang mga biktima una namauli sa Naga.
Si Bucao gitanggong karon sa prisohan sa Talisay samtang si Gabiana gipapauli sa ilang pinuy-anan human matambali sa TDH.
Ang motorsiklo nga ilang gisakyan wala hinuon makasinati og grabeng kadaot ug anaa karon sa buhatan sa kapolisan sa dakbayan. (BANATNEWS)