CEBU, Philippines - Ang Land Transportation Office (LTO)-7 mipalapad sa ilang buhatan sa sulod sa SM City sa North Reclamation Area, ning siyudad sa Sugbu, sumala pa ni LTO-7 Regional Director Raul Aguilos kagahapon.
Matud pa ni Aguilos nga gumikan sa nagkadaghan nilang kliyente matag adlaw, gihimo na nilang duha ka espasyo sa SM City ang ilang giabangan karon gikan sa usa lang ka space sa milabay'ng tuig.
Sa pagkakaron matud pa ni Aguilos, gibahin nila ang ilang buhatan diin ang unang espasyo niini gihimo nilang dawatanan sa mga magpa-renew og lisensya, samtang ang pikas space mao ang drug testing center.
Si Aguilos nagkanayon nga ang dawaton sa ilang buhatan sa SM mao lamang kadtong mga yano nga renewal sa lisensiya samtang ang ubang mga aplikasyon adto gihapon didto sa LTO office sa N. Bacalso Street, ning dakbayan.
Dugang pa ni Aguilos nga gituyo sa ilang buhatan ang pagpalapad sa ilang sentro sa renewhanan sa lisensya sa mga drayber aron mas daghan sila og maserbisyohan nga mga tawo dinhi sa Sugbu ug sa Central Visayas. – BANAT NEWS