Tanod nakuhaan og marijuana sa PIIB; plantasyon niini natultolan sab

CEBU, Philippines - Nasikop sa buy-bust operation sa mga sakop sa Provincial Intelligence and Investigation Bureau (PIIB) ang usa ka barangay tanod human kini mitunol og mga pinaugang dahon sa Marijuana ngadto sa police decoy niadtong miaging hapon sa barangay Sibacan, dakbayan sa Danao.

Ang nadakpan mao si Ricardo Labador, barangay tanod sa nahisgutang dapit human masakmiti og duha ka putos nga pinaugang dahon sa Marijuana.

Nunot sa pagkasakmit ug pagkasikop sa suspetsado natultulan usab sa mga polis ang gitamnan niini sa maong mga illegal nga tanom ug nalarot ang mokabat 200 usab ka punoan sa marijuana sa bung-aw nga bahin sa nahisgutang dapit.

Si SPO1 Jose Salingua sa kapolisan sa dakbayan sa Danao miingon nga si SPO1 Ferdinand Navales sa PIIB maoy nangulo sa buy-bust operation sa maong dapit. – BANAT NEWS