Koleksiyon sa BOC-Cebu taas
CEBU, Philippines - Milampos sa paglapas sa ilang unang target collection sa bulan sa Enero ning tuiga ang Customs District Port of Cebu sa bag-ong pagdumala ni Collector Ronnie Silvestre.
Base sa binuwang koleksyon ni Conrado Abarintos, ang hepe sa Collection Section sa Customs Port of Cebu nasuta nga mokabat sa P590,250,000 ang target niini sa bulan sa Enero apan nakakolekta kini og balor P591,842,320.
Si Silvestre mihangop sa maong kalamboan sanglit mas taas kini kun itandi sa bulan sa Enero sa milabay'ng tuig nga ang target collection P420 milyones lamang.
Matud pa ni Carlos Corsiga, ang Assessment Chief nga mao kini ang unang higayon nga ang BOC-POC nakaangkon og dakong koleksiyon sa bulan lang sa Enero sukad-sukad.
Si Corsiga miingon nga sa matag tuig kasagaran nga ang bulan sa Enero gamay ra og koleksyon gumikan sa kasagarang mga kompaniya sa ubang kanasuran mag- imbentaryo pa maong minus ang importasyon niini dinhi sa nasud.
Si Silvestre sa iyang bahin nagkanayon nga nagpaabot pa gihapon sila sa resulta sa hangyo ngadto nila ni BOC Commissioner Napoleon "Boy" Morales ug Finance Secretary Margarito "Gary" Teves nga paubsan ang ilang target collection ning tuiga nga P 7.670 bilyones.
Sa milabay'ng tuig ang target collection P5.6 milyones lamang apan gumikan kay nalapas man kini sa nakalabay'ng collector nga si Recardo Belmonte gipatas-an pa kini karong tuiga. – BANAT NEWS
- Latest
- Trending
