CEBU, Philippines - Patay nang nakit-ang naglutaw sa dagat ang usa ka welder sa barko nga gituohang nalumos samtang nagtrabaho diha sa pantalan sa barangay Dunggo-an siyudad sa Danao kagahapon sa alas 8:30 sa buntag.
Ang nakit-ang patay mao si Sonny Matugas Durano, 21, molupyo sa maong lugar ug welder sa mga barkong i-dry dock sa maong pantalan.
Matud ni PO3 Bryan Batiquin sa Danao City Police dihang nahinabi sa Banat News nag-welding ang biktima dihang ulahing nakit-an ug gituohang natagak kini sa dagat, gidudahan usab nga atol sa pagkatagak naigo kini sa usa ka gahi nga butang una pa malumos, apan nahibulong ang mga polis sa nakitang samad diha sa liog niini.
Ang mga kaubanan niini maoy nakadiskubre sa patay’ng lawas dihang milutaw na kini nianang pagkabuntag, ang patay’ng lawas gipaubos sa autopsy pagsuta kun wala bay foul play ang kamatayon niini.
Gibutyag sa mga kabanay niining niadto pang milabay’ng Huwebes nibiya sa ilang balay ang biktima aron motrabaho ug wala na kini mopauli nianang pagkagabii hangtud nga nakit-an nalang kini nga patay na. (Darrel Carumba) (BANATNEWS)