CEBU, Philippines - Talandugon ang kahimtang sa 14 anyos nga dalagita kinsa gidunggab sa wala hiilhing armadong lalaki nga misuway sa paglugos kaniya sulod sa ilang balay sa barangay Yati, lungsod sa Liloan kagahapon sa alas 2:00 pasado sa kaadlawon.
Si SPO1 Gay Servilla sa womens’ desk section sa Liloan Police Station mibutyag sa Banat News nga puwerting kurata sa biktima sa dihang misuway na og patong kaniya ang lalaki.
Apan dihang mikamamad ang tingog sa dalagita sa kakuyaw ug misinggit uban sa pagpangayo og panabang sa iyang mga silingan gipanunggab siya sa manlulugos.
Samdan ang biktima sa iyang liog, suwang ug tiil ug gumikan sa kahadlok nga hiabtan siya sa nagmata nga mga silingan, mibiya kini sa biktima ug mikaratel og dagan pahilayo sa maong lugar.
Gihatod dayon sa iyang mga silingan ang biktima ngadto sa Vicente Sotto Memorial Medical Center sa dakbayan sa Sugbo.
Matud pa ni SPO1 Gay Servilla nga nag-inusara sang natulog sa ilang balay ang biktima ug malagmit gitiman-an kini sa manlulugos.
Hinuon bahala na og nadunggaban basta wala makuha ang iyang pagka-babaye, sumala sa police woman.
Samtang padayong gipanid-an sa kapolisan sa Liloan karon aron sayron kun si kinsa ang maong manlulugos. (Romeo T. Limpangog) (BANATNEWS)