CEBU, Philippines - Duha ka polis nga miresponde ug miimbestigar sa traffic incident nga may kalambigitan sa sinagop sa mayor sa dakbayan sa Talisay ang gipangrelibohan kagahapon sa ilang pwesto diha sa traffic division tungod sa gihimong imbestigasyon batok kanila.
Si Supt. Henry Biñas, hepe sa Talisay City Police Station sa pakighinabi niini sa Banat News kagahapon nagkanayon nga girelibuhan sila si SPO1 Elmer Saladas ug PO3 Roelito Tano. Si Saladas gibalhin sa police station sa barangay Poblacion samtang si Tano diha sa sub-station sa city jail.
Si Saladas maoy miimbestigar kabahin sa insidente sa trapiko niadtong Biyernes sa kaadlawon may kalambigitan kang Joavan Fernandez sa usa ka traffic accident nga diin kini gipasanginlan sa magtiayong Irene ug Jonathan Ignacio nga mition kanila og armas human ang ilang motorsiklo napasok sa sakyanan sa anak sa mayor.
Si Biñas mibutyag nga tungod sa giingong wala pagkapkap ug wala pagsusi sa sakyanan ni Joavan pagtino sa kamatuuran sa alegasyon sa magtiayon kabahin sa armas maoy basehanan sa pag-imbestigar batok sa maong mga polis.
Si Joavan gipasanginlan sa magtiayong Ignacio nga human aksidene gipangtiunan hinuon sila og armas niini ug mipailang iyaha ang Talisay. Apan bisan paman sa reklamo kabahin sa armas wala kapkapi, rekisaha sa mga polis ang sakyanan ni Joavan. (Brenda Batuto) (BANATNEWS)