CEBU, Philippines - Usa ka grade 5 nga maestra ang midangop sa kapolisan human kini gikulata sa usa ka minor de edad nga lalaki sulod mismo sa iyang lawak saringan pasado alas-6 sa hapon niadtong Huwebes sulod sa Dumanjug Central School.
Ang maong magtutudlo mao si Lecenea Formento, 33, residente sa maong lungsod , samtang napakyas kini pag-ila sa mikulata kaniya nga gibana-bana niyang nagpangidaron og 15 hangtod 16 anyos, puti-on, ug 5’4 ang gitas-on.
Matud pa ni SPO1 Joselito Abella nga nahinabi sa Banat News nga nahitabo ang pagpangulata pipila ka minutos human mamauli ang mga bata ug samtang kini nangandam aron mopauli.
Sa wala pa mogawas ang biktima mihapit una kini sa kasilyas nga nahimutang sulod sa iyang lawak saringan apan nakugang nalang kini dihang sa iyang paggawas sa kasilyas nakasirado na ang iyang lawak.
Diha-diha nalingian niya ang usa ka batan-ong nagbarog diha sa sulod maong iyaha kining gipangutana og “unsa may ato diri dong?”
Sumala pa ni Abella nga mitubag usab ang maong batan-on nga gusto usab niining ‘mangihi’ maong iya kining gipangutana kun nganong diha gyud sa iyang lawak ug iyaha kining gimandoan sa paggawas.
Apan imbes nga motuman kalit nga midasmag ang maong batan-on sa biktima hinungdan sa pagkatumba sa naulahi ug diha-diha gituok dayon gikulata.
Ang biktima nakahimo sa pagsukol ug nakaipsot ug nakahigayon sa pagdagan gawas sa lawak ug nangayo og tabang. Wala na diha ang gikatahapan pag-abot sa mga polis.
Daghang anggulo ang gisusi sa kapolisan sa maong hitabo nga naglakip sa posibilidad nga pagpangawat, pagsuway panglugos ug posibilidad nga may kaligutgot ang batan-on ngadto sa biktima. (Lesley Caminade) (BANATNEWS)