CEBU, Philippines - Si Kongresista Nerissa Soon-Ruiz mitumbok kang kanhi Kongresista Clavel Martinez sa ika-upat nga distrito sa lalawigan nga maoy namugos aron makalingkod ang iyang anak nga si kanhi Mayor Celestino “Tining” Martinez III sa Bogo, sa pagka-representante sa ika-upat nga distrito.
Sumala pa ni Ruiz atol sa press conference nga gipatawag ni Kongresista Benhur Salimbangon sa ika-upat nga distrito, sa Baseline Restaurant kagahapon, nga nakadawat siya og taho gikan sa iyang mga kaubanang kongresista nga si Clavel maoy namugos kang Deputy House Speaker Eric Singson nga maka-take oath si Tining sa buhatan niini.
Apan iyang gidepensahan si Salimbangon pinaagi sa pagtumbok nga "hangtod sa katapusang roll call sa House of Congress ang pangalan ni Benhur Salimbangon mao gihapon ang gitawag ug walay Tining Martinez.”
“Sigon sa akong nasayran sa akong kauban, si deputy house speaker Singson napugos na lang intawon sa pag-isyu og certificate of oath of office aron mahilom ang inahan," si Soon-Ruiz nagkanayon.
Gipasabot ni Soon-Ruiz nga sa section 5 sa House Rules, ang bag-ong sakop sa Kongreso kinahanglan manumpa atubangan sa House Speaker atol sa open session ug ang House Speaker maoy momando sa secretary general nga ma-enroll sa listahan sa mga kongresista ang bag-ong molingkod nga kongresista.
Apan iyang gitataw nga si Tining wala gyud ma-enroll kay "wala dawata sa Kongreso ang pangalan ni Martinez."
Samtang si Salimbangon miingon nga dili ang mga Sugbuanong kongresista ang naka-impluwensiya nga dili motambong ang kapin sa 200 ka mga kongresista aron walay makuhang “quorum.”
Gitataw ni Salimbangon nga wala siya mang-impluwensiya.
Si Salimbangon mitug-an nga si Clavel maoy misulod sa plenary hall ug miduol ngadto kaniya, kang Soon-Ruiz, mga kauban nga sila si Pablo Garcia ug anak niining si Pablo John Garcia.
Sumala pa ni Salimbangon nga na-insulto ang kadaghanang kongresista kay kadto lamang nga napiling kongresista ang makasulod sa Plenary hall hinungdan nga ang mga “recognized” nga kongresista namahawa na lamang kay wala usab mapugngi sa guwardiya sa Ubos Balay Balaoranan si Clavel Martinez. Gisulayan sa pagtawag sa Banat News ang cellphone ni kanhi kongresista Clavel Martinez apan wala kini ma-contact. (Chester Abadilla) (BANATNEWS)