18-anyos giluba patay

CEBU, Philippines - Patay ang usa ka 18-anyos nga batan-ong lalaki nga maoy nadunggaban sa dihang misuway og uwang sa iyang barkada nga nakasugat og sukmagay sa Camp Bridge, barangay Tungkop, lungsod sa Minglanilla niadtong Miyerkules sa alas 8:45 sa gabii.

Si Jessie Reponte alyas Tata, 18, ulitawo ug molupyo sa Central-I, Inayagan, Naga, patay na nga naabot sa tambalanan.

Ang nakadunggab usa ka 16-anyos nga residente sa barangay Tabunok, siyudad sa Talisay ug giingong anak og tanod sa maong lugar.

Matud ni PO1 Humprey Alpas sa Minglanilla Police Station sa dihang nahinabi sa Banat News, si Reponte ug barkada niining nailhan lang sa ngalang “Gong-Gong” aduna nay karaang kasungian tali sa 16-anyos nga mamumuno.

Sa wala pa ang pagpanunggab, giatngan ni Reponte ug Gong-Gong ang 16-anyos sa paggawas niini sa gitrabahoan ug didto ilang gikonprontasi.

Si Gong-Gong misukmag sa 16-anyos ug maayong pagkaigo sa nawong hinungdan nga si Reponte misuway og patunga aron hunongon ang panag-away.

Apan ang 16-anyos mibunot og kutsilyo nga gidaladala niini ug gidiretso og duslak kang Gong-Gong apan abtik kining nakalihay ug walay swerte nga naigo sa dughan si Reponte.

Sa dihang naigo si Reponte, giusban pa kini og dunggab ug naigo sa liog. Gibanabanang miabot og pito ka samad dinunggaban ang naangkon ni Reponte.

Ang mga estambay sa maong lugar mao nay mitabang sa biktima ug mihatod dayon sa Minglanilla District Hospital apan gideklarar sa mga doktor nga dead on arrival.

Samtang ang minor de edad nga suspek abtik usab kaayong nakapara og taxi dayong sakay pahilayo ug wala na maabti sa mirespondeng kapolisan.

Apan kagahapon sa buntag, mipahibalo ang kapolisan sa Talisay ngadto sa Minglanilla Police Station nga boluntaryong mitahan ang 16-anyos ug gi-turnover aron pasakaan og kaso. – BANAT NEWS