Shabu Queen nasikop

CEBU, Philippines - Usa ka ginang nga gihulagway sa kapolisan nga ‘Shabu Queen’ nasikop uban sa iyang ‘assistant’ ug nakuhaan og dul-an P200 mil nga kantidad sa gituohang shabu atol sa buy-bust operation sa Investigation and Detective Management Branch (IDMB) ug sa Philippine Drug Enforcement Agency (PDEA-7) sa miaging gabii sa Tagonol Road, barangay Basak-San Nicolas.

Si Chuebe “Bing” Lim, 54, molupyo sa barangay Guadalupe ug lumad nga taga Digos, Davao del Sur nailhan sa kapolisan nga “shabu queen” tungod sa kadaghan sa shabu nga iyang mabaligya, uban ang iyang kaabag nga si Edna Flores, 50, taga dalan Tres de Abril, barangay San Nicolas-Proper.

Si Lim ug Flores gikatahong namaligya og shabu sa Tagonol sa dihang gipahigayon ang buy-bust operation. Si PO2 Dennis Mosqueda maoy mipalit og usa ka bultong shabu ngadto ni Lim nga nagkantidad og P35 mil gamit ang boodle money.

Sa pagdawat sa bayad, gisikop gilayon sa kapolisan silang Lim ug Flores.

Sa gipahigayon nga body search, si Lim nakuhaan og usa ka bultong pakete sa gituohang shabu ug usa ka medium pack nga gituohan usab nga shabu samtang ang iyang kuyog nga si Flores nakuhaan usab og tulo ka medium nga pakete.

Sa pakighinabi sa mga tigbalita, si Lim mitug-an nga igo lang siya nga miduaw sa maong lugar aron pasalamatan ang iyang higala nga nagpahulam kaniya og P6 mil niadtong na-ospital siya.

Apan sa dihang nagsakay na siya sa iyang sakyanan nga Hyundai, kalit lang siyang gisikop sa walay igong hinungdan.

Matud pa ni Lim nga human siya nasikop niadtong 2008 tungod sa ilegal nga drugas, miundang na siya sa maong bisyo ug igo na lang siyang nagtagad sa ilang ginagmay’ng negosyo susama sa ilang humayan sa Butuan, gamay’ng tindahan sa Guadalupe ug landscaping service.

Matud pa ni Lim nga ang ilang mga negosyo mao karon ang iyang gikuhaan og kunsomo sa pamilya.

Samtang si Cebu City Police Director Patrocinio Comendador nagkanayon nga ang pagkasikop ni Lim sa Tagonol ikatulo na niyang pagkasikop.

Nagtuo siya nga dinagko ang gipayuhot ni Lim tungod kay niadtong 2008, nakuhaan kini og 10 gramos nga shabu.

Dugang pa ni Comendador nga base sa ilang nadawat nga taho, si Lim adunay ubay-ubay’ng pundo sa shabu, apan ila pa kining sutaon ug gani adunay taho nga bisan ang taga probinsya moduol kaniya aron lang mopalit og shabu.

Si Comendador mibutyag nga ila karong target ang mga dinagko nga klase sa tigpayugot og shabu aron makuhaan na ang mga krimen nga nahitabo sa siyudad nga nagsumikad sa paggamit og shabu.

Nasayran nga si Lim ika-10 sa Drug Watchlist sa PDEA-7 sa siyudad sa Sugbo ug kapolisan.

Sa pagkakaron, ang duha kasamtangan nga nagtingkagol sa karsel sa Cebu City Police Office samtang nagpaabot sa kaso nga isang-at batok kanila. – BANAT NEWS