LBC sa Lilo-an gilungkab

CEBU, Philippines - Gituohan nga dakong kantidad sa salapi ang nasakiyo sa wala mailhing mga manglungkabay nga miigo sa LBC Kwarta Padala nga nagbase sa Poblacion, lungsod sa Liloan niadtong Miyerkules sa alas 3 sa kaadlawon.

Ang staff nga si Lucy Almirante ug ang team leader nga si Arthur Alquisalas Batucan maoy nakadiskobre nga guba na ang vault nga gisudlan sa kuwarta nianang pagkabuntag.

Matud ni PO2 Rutchel Jugalbot sa Liloan Police Station sa dihang nahinabi sa Banat News subay sa inisyal nga imbestigasyon sa hepe nga si Chief Insp. Eddie Ricamara ug mga sakop sa Crime of the Scene Operative (SOCO) nagpakita nga giguba ang kandado sa pultahan niini ug didto moagi ang wala pa matinong gidaghanon sa mga kawatan pagsulod sa maong buhatan. Sa gihimong pakisusi, nahanaw ang P3 mil nga kita niini nianang pagka-adlawan nga diha sa lamesa ug ang wala pa matinong kantidad sa kuwarta nga gibutang sa vault human usab giguba ug gipugos og abli sa mga manglungkabay.

Apil sa gisubay sa nagpadayong imbestigasyon sa kapolisan ang posibilidad nga dunay kausaban sa mga patakaran paghipos sa kita ang mga personnel sa maong kompaniya ug wala usab isalikway ang posibilidad nga ‘inside job’ ang hitabo. - Darrel A. Carumba (BANAT NEWS)