Nasaypang 'asset' gipusil sa Crips

CEBU, Philippines - Nasaypan nga ‘asset’ sa kapolisan napusilan sa giingong sakop sa Crips gang pasado alas 10 sa miaging gabii sa Jansen Site, sitio Alumnos, barangay Basak-San Nicolas.

Si Wilfredo Francoi, 18, molupyo sa nahisgutang lugar ug usa ka drayber sa traysikad gipusil sa sakop sa Crips gang nga nailhan lang sa ngalan “Jeric” nga molupyo sa sitio Sta. Cruz sa nahisgutang barangay. Si Jeric uban sa usa ka wala mailhing lalaki atol sa hitabo.

Nasayran nga ang biktima nagbarogbarog sa nahisgutang lugar samtang wala pa kini pasahero sa dihang kalit lang nga mipatim-aw si Jeric uban sa usa ka wala mailhing lalaki.

Si Jeric nangutana pa ngadto kang Francoi sa pag-ingon, “Asset ka bay?” sa wala pa kini mopusil kaniya.

Si Francoi naigo sa kilid nga bahin sa iyang lawas ug gidala sa Cebu City Medical Center (CCMC), samtang si Jeric ug ang wala mailhing lalaki dali usab nga nakaikyas human sa hitabo.

Si SPO4 Alex Dacua sa Homicide Section nagkanayon nga ang biktima walay kalambigitan sa bisan unsang klase sa gang.

Wala makonpirmar sa kapolisan kun asset ba kini sa mga awtoridad.

Padayon pa karon nga gipangita sa kapolisan ang nahimutangan ni Jeric ug giila pa ang kuyog niining lalaki atol sa pamusil. – BANAT NEWS