Treasure hunting sa Garing gisusi

CEBU, Philippines - Higpit karong gisusi sa kapolisan ang gikatahong ilegal nga treasure hunting sa barangay Garing, lungsod sa Consolacion.

Si Insp. Bonifacio Tecson, hepe sa kapolisan maoy naghimo pakisusi sa nahisgotang lugar human usab madawat ang taho nga ilegal nga pagpangubkob sa nahisgotang dapit.

Si PO1 Sadili sa kapolisan sa nahisgotang lungsod miingon nga naglakip sa maong pakisusi nga gihimo ni Insp. Tecson mao ang pag-ila sa mga nagpasiugda og treasure hunting sa nahisgotang lugar.

Matud pa ni Sadili nga dili pa nila matataw kun nakakubkob na ang mga nagpasiugda sa pagpangubkob sa maong lugar og mga bililhong butang sa maong pagpangubkob.

Dugang pa ni Sadili nga sa pasiunang pakisusi nga gihimo maoy nasuta nga walay tukmang dokumento nga naghatag og pagtugot alang sa maong pagpangubkob sa nahisgotang dapit.

Si PO1 Sadili miingon nga si Kapitan Edwin Alin sa barangay Danlag sa pagpakighinabi kang Insp. Tecson   nangayog kasayuran sa tukmang ahensiya nga maoy maduol alang sa paghatag og dokumento nga mahimong legal ang ilang pagpangubkob og mga antik nga mga butang. - Romeo T. Limpangog (BANAT NEWS)