Baliguat naghuwat sa hukom

CEBU, Philippines - Nagmalaumon gihapon dili mabalhin og laing puwesto ang hepe sa Minglanilla Police Station human kini makadawat og memorandum nga nagmando kaniya sa pag-eksplikar nganong wala siya makapaluag sa trapiko sa Minglanilla dihang milabay ang Presidential convoy paingon sa lungsod sa Argao niadtong Enero 24, 20l0 sa hapit nang kaudtohon.

Sa pakighinabi sa Banat News ni Inspector Leoncio Baliguat Jr. nga maoy hepe sa kapolisan sa Minglanilla, nagkanayon nga dako ang iyang panghinaot nga unta dili nalang siya mabalhin og laing lugar kay wala man niya tuyoa nga biyaan ang iyang puwesto sa maong higayon.

Matud pa ni Baliguat nga didto siya sa hospital niadtong tungora   kay giatiman niya ang iyang asawa nga bag-ong nanganak, apan gibilin niya ang pag-atiman sa trapiko sa Minglanilla pinaagi sa iyang mga pangabagang polis.

Naatol lang nga puwerting huota sa trapiko dihang milabay ang convoy ni Presidente Gloria Macapagal Arroyo sa maong higayon kay mihatod kini sa lubong ni kanhi Press Secretary Cerge Remonde didto sa Argao.

Maoy hinungdan nga miungot usab makadiyot ang mga sakyanan nga kauban sa biyahe sa Pamuno nasud. 

Hinuon matud pa ni Baliguat nga hangtod karon wala pa siya makadawat og mando gikan sa ilang labaw human siya makahatag sa iyang suwat eksplikasyon.

Matud pa ni Baliguat nga kun ibalhin gyud siya og laing puwesto, wala siya'y mahimo gawas sa pagtuman niini.

Samtang ang kapolisan sa Minglanilla mipasabot nga naglibog sila kun kinsay nagtaho ngadto sa ilang labaw nga matud pa wala kunoy mga polis ang Minglanilla dihang milabay ang convoy sa Presidente nga unta diha man sila sa ilang tagsa-tagsa ka puwesto sa maong higayon.

Sa pagkakaron nagpaabot nalang si Baliguat kun unsay mando sa iyang labaw'ng opisyal, manegatibo man o positibo, andam siya sa pagdawat ning tanan nga walay kahiubos. – BANAT NEWS