Wagas gilaksi na sa listahan

CEBU, Philippines - Ang Regional Trial Court mitahod sa desisyon sa first level court nga nagmando sa Election Registration Board nga ipalaksi ang ngalan ni kanhi mayor Gilbert Wagas sa lungsod sa Compostela gikan sa listahan sa mga botante sa maong lungsod nga naglangkat sa iyang katungod sa paglansar sa pagka-kongresista tungod sa iyang pagka-konbikto sa kasong pagwaldas sa salapi sa publiko.

Si RTC Branch 55 Judge Ulric Cañete sa Mandaue City miila sa desisyon ni   Municipal Circuit Trial Court Judge Jasper Jesse Dacanay niadtong December 11, 2009 sa pagwagtang na sa katungod ni Wagas sa pagbotar sa precint 15-A sa lungsod sa Compostela.

Kahinumdoman nga si Wagas misupak sa mando ni Dacanay pinaagi sa pag-apelar niya ngadto sa RTC-Mandaue ug mipadayag nga ang iyang pagka-konbikto dili pa pinal.

Apan bisan pa niini, gihatagan ni Cañete og gibug-aton ang desisyon sa ubos nga hukmanan.

Matud pa ni Canete nga dihadiha gisalikway sa korte ang maong hangyo ni Wagas gumikan sa pagkakuwang og basehanang legal niini.

Miingon si Cañete nga ang gibasehan nila nga final na ang pagka-konbikto ni Wagas mao ang hukom nga naumol sa Korte Suprema niadtong Septyembre 16, 2002 nga nagpakanaog og silot kang Wagas nga Reclusion Perpetua o 40 anyos nga pagka-priso. Kauban ni Wagas nga nasilotan mao ang OIC treasurer sa Compostela kaniadto nga si Dominador Maravillas, Jr.

Dugang pa ni Dacanay nga ang pagka-konbikto ni Wagas napatik na sa Book of Judgements   busa disqualified na siya sa listahan sa mga rehistradong botante sa lungsod   ug kini pinasubay sa Section 1 sa Republic Act 8189 o nga mao ang   Voters Registration Act of 1996.

Si Wagas gisikop niadtong Nobyembre 4, 2009 sa mga ahente sa National Bureau of Investigation (NBI 7) sa sulod sa SM City Cebu human siya kalutsi og bench warrant nga giluwatan sa Sandiganbayan fourth division.

Niadtong October 8, 2001, si Associate Justice Rodolfo Palattao sa Sandiganbayan nakasakop kang Wagas ug Maravillas nga sad-an sa sayop nga paggahin sa P376, 618.65 hinungdan nga nakapakgang kaniya sa paghupot og puwesto sa gobyerno. – BANAT NEWS