CEBU, Philippines - Patay diha-diha ang 49 anyos nga ginang ug kritikal usab ang kahimtang sa drayber sa motorsiklo sa dihang gidasmagan ang ginang sa iyang pagtabok sa karsada didto sa barangay Talavera, siyudad sa Toledo niadtong Lunes sa alas 6:57 sa gabii.
Ang biktima nga patay nang nadangat sa tambalanan mao si Alexandra Polmiri Mahinog, 49, minyo ug molupyo sa maong lugar samtang drayber sa motorsiklo nga talandugon usab ang kahimtang mao si Terso Homicillo, minyo ug molupyo sa barangay Pooc, Toledo.
Matud ni SPO3 Allan Barquin, traffic investigator sa Toledo City Police Station sa dihang nahinabi sa Banat News ang ginang kalit nga milabang sa karsada atbang sa Talavera Elementary School ug naatol nga maoy pag-agi sa motorsiklo niadtong tungora.
Tungod kay dunay gikusgon ang pagpadagan sa motorsiklo hinungdan nga nadasmagan gyud kini ug maayong pagkalamba sa biktima ug nalabay usab ang drayber sa motorsiklo nga nalimbuwad.
Ang mga estambay sa maong lugar maoy mitabang ug mihatud sa ginang ug sa drayber sa motorsiklo sa Toledo City Hospital apan gideklarar nga dead on arrival ang ginang tungod sa dakong samad sa ulo ug kalawasan.
Samtang ang drayber sa motorsiklo gihatod usab dayon lahos sa tambalanan dinhi sa dakbayan sa Sugbo human gihulagway sa mga doktor nga anaa usab sa kritikal nga kahimtang human makaangkon usab og dakung kadaot.
Ang tag-iya sa motorsiklo nga si Simplicio Sanchez midangop sa kapolisan ug nagpa-blotter kay ang maong motorsiklo nga nakadasmag sa ginang gikatahong gikawat. – BANAT NEWS