Villar wa mokibra ang suporter

CEBU, Philippines - Wala makibrahe ang gidaghanon sa mga mipabor sa kandidatura ni Senador Manuel Villar sa pagka-presidente sa nasud luyo sa gikagubtang isyu bahin sa C-5 nga proyekto niya sa karsada.

Gani base sa labing awahing survey sa Social Weather Station (SWS) gikan sa Enero 21-24 alang sa Business World, sa mikabat sa 2,100 ka mga respondente sa tibuok nasud nga gisukit kinsa ang gusto nilang pilion sa pagka-presidente sa nasud sa umaabot nga election, 35 porsento ang mipabor kang Villar sa Nacionalista Party samtang ang sa kang Senador Benigno Aquino III sa Liberal Party, 42 porsento.

Sa maong survey nagpakita nga misaka ang rating o gidaghanon sa mga mipabor kang Villar itandi sa milabay’ng survey sa SWS niadtong Decembre 5-8, 2009. sa deperensya nga 8 puntos.

Maoy hinungdan nga bisan nagkaguliyang ang ubang senador sa pagkulitog sa isyu batok kang Villar nga gipamatud-an usab sa senador (Villar) nga dili tinuod, wala mokibra ang iyang rating.

Maoy hinungdan nga nagpasalamat si Villar sa tanang mga supporter niya nga nagpabiling lig-on sa ilang baruganan sa pagpaluyo kaniya tungod kay nasayod sila nga wala siya magtinunto sa kuwarta sa kagamhanan sukwahi sa mga politikanhong pamasangil batok kaniya nga gituohan niyang gihimo lamang sa iyang mga kaatbang aron madaot ang iyang kandidatura.

Hinuon sa pagkakaron mao ra og nabiyaan siya sa puntos itandi sa mga dumadapig ni Senador Aquino apan gituohan ni Villar nga sa dili madugay mag-anam kagamay ang iyang biya tali ni Senador Aquino hangtod nga sa adlaw sa piniliay mahimong hiapsan niya o molapaw pa siya kun debuenason. - Wen Celen (BANAT NEWS)