Plebisito para Banawa-Englis nagkainit na

CEBU, Philippines - Nagkainit na ang kampanya sa gitakdang plebisito alang sa hingpit nga pagbuwag sa sitio Banawa ug Englis gikan sa barangay Guadalupe.

Kini bisan pa man kun wala pay kasigorohan kun mahinayon ba ang referendum tungod kay wala pay gahin alang sa maong katuyoan.

Ang presidente sa United Banawa-Englis Association (UBEA) nga si Antonio Dangcalan misaway na kang Guadalupe barangay captain Eugenio “Jingjing” Faelnar tungod kay giingong gigamit sa kapitan ang Birhen sa Guadalupe sa pagkampanya niini nga supakon ang pagbuak sa ilang barangay.

“Nonsense man si Kapitan mo-estorya kay hasta ang Birhen iya mang gamiton kay ug dili kuno mobutar, ang Birhen dili na paabton sa Englis, ambot kung unsa ang iyang gibasihan ana, nalimot siguro siya sa separation sa church ug sa government,” sumala ni Dangcalan.

Kusganon hinuong gipanghimakak ni Faelnar ang pasangil ni Dangcalan, uban sa pag-awhag niini nga mag-iyahay na lang sila sa pagpangampanya.

“Wala man ko moingon nga dili ipaabot, wala gyud! Kana sila nagsige na lang na sila og kyaw-kyaw, mangampanya lang unta sila og ila, mora na man hinuon na sila og mga tolonggis, ang importante diha kun ang mga tawo mosugot ba o dili,” matud ni Faelnar.

Ang plebisito alang sa pagbuwag ug paghimong laing barangay sa sitio Banawa ug Englis gikan sa barangay Guadalupe gitakda karong Pebrero 28.

Nasayran nga si Kongresista Antonio Cuenco mihimo na og follow-up sa Malacañang labot sa gamiton nga gahin alang sa referendum.

Ang kongresista nga maoy mipalabang og proposal sa Kongreso alang sa paghimong laing barangay sa sitio Banawa ug Englis nangayo og P1.5 milyones nga budget.

Laing option ni Cuenco mao ang pagpangayo usab og assistance sa kagamhanan sa dakbayan kun dili magahinan sa Malacañang og pundo ang maong tinguha. – BANAT NEWS