CEBU, Philippines - Nasikop sa kapolisan sa Bohol ang giingong psycho killer kinsa giakusahang miputol sa ulo sa iyang kaubang basurero sa White Road, barangay Inayawan, dakbayan sa Sugbo.
Ang suspetsado nailhan nga si Edgardo Abangan, hingkod , nga taga sitio Tumoy, sa nahisgutang barangay.
Siya maoy suspetsadong miputol sa liog ni Gaudioso Dela Cruz, 49, minyo, nga silingan niya sa sitio Tumoy niadtong Enero 21, ning tuiga.
Matud pa ni Abangan nga nahinabi sa Banat News nga niadtong Enero 21 human sa ilang panag-inom nagkalalis siya ug ang biktima bahin sa ‘tagay-tagay’ hinungdan nga dihang gihatod siya sa biktima sa ilang balay iyang nakita ang ilang sundang ug sa wala’y kukahadlok, iya dayon kining gitigbas.
Unya human niya kini tigbasa, gigutlab dayon niya ang ulo niini unya gisulod sa sako ang lawas ug gilabay ngadto sa basurahan sa Inayawan.
Mitug-an si Abangan sa Banat News nga midangop siya ngadto sa panimalay ni Julieto Ybañez sa barangay Pitogo, lungsod sa Carlos P. Garcia sa lalawigan sa Bohol.
Apan sa pakighinabi usab sa Banat News ni PO2 Edmund Tiempo sa Pardo Police Station kini nagkanayon nga niadtong Enero 29 ila pang nakit-an ang suspetsado sa gipahigayon nilang hot pursuit operation apan wala nila kini masikop.
Dugang pa ni Tiempo nga nakadawat sila og tawag gikan kang SPO4 Wilfredo Plata sa Bohol Police Station nga nadakpan nila ang suspetsado hinungdan nga niadtong Lunes ila dayun kining giadto sa Bohol ug gidala nganha sa Homicide section sa kapolisan sa dakbayan sa Sugbo kagahapon aron ma-imbestigar.
Ang suspetsado atol sa imbestigasyon miangkon gyud nga siya’y mipatay sa biktima ug giandam na ang kasong murder nga ipasaka batok kaniya. - Lesley Caminade (BANAT NEWS)