Armas gition sa ulo wala kabuto

CEBU, Philippines - Ang 24-anyos nga lalaki kinsa giingong naluwas sa tinong kamatayon kay mikagar ang armas nga gipusil kaniya didto sa sitio Neighborhood, barangay Tabunok, dakbayan sa Talisay sa miaging adlaw midalidali pagsumbong sa kapolisan sa maong dakbayan.

Ang gidebuenas kay wala kabuto ang armas de fuego nga gition na sa iyang ulo mao si Roseller Pasuiquen, nga taga Neighborhood, samtang ang miluthang kaniya nailhan nga usa ka “Jojo”, iya ra usab nga silingan.

Base sa imbestigasyon ni PO2 Narciso Alforque, nasayran nga si Pasuiquen nag-alsa og barbecue stand sa maong lugar, apan si Jojo kinsa giingong hubog ug nagbitbit og pusil, kalit lang miduol ngadto sa biktima ug sa wala'y igong rason giti-on niini ngadto sa ulo ni Pasuiquen ang iyang armas apan sa pagkablit niya makaduha ka higayon sa gatilyo niini igo lang mihagtik ug wala gyud makabuto.

Sa kahadlok ni Pasuiquen, midagan kini pahilayo sa suspetsado ug midiretso ngadto sa police station.

Apan ang suspetsado mikabad usab og dagan pahilayo sa maong lugar ug gipangita na karon sa kapolisan.

Sa laing bahin, nagtingkagol na karon sa prisohan sa dakbayan sa Talisay ang usa ka tawo nga nasakmitan sa kapolisan og kutsilyo ug usa ka paketeng shabu niadtong Biyernes sa gabii, duol sa tulay sa Mananga, barangay Tabunok.

Siya mao si Rizaldy Lapinid alyas “Jeg-Jeg”, 27, taga barangay Tapul sa nahisgutang siyudad .

Si Lapinid kinsa naggunit og cellphone kompiyansa ra kaayong miagi sa atubangan sa mga polis nga nagpundo sa maong lugar samtang naniid sa mga tulisan ug mga kriminal, apan paspas kaayo kining naglakaw paingon ngadto sa merkado.

Gumikan kay natahap ang kapolisan sa linihokan sa suspetsado ila kining girikisa ug didto nasakpan ang gitangkil niining kutsilyo ug usa ka paketeng shabu.

Gipaabot nalang niya karon ang tukmang kiha batok kaniya. – BANAT NEWS