Milikay sa checkpoint nadasmag sa taxi

CEBU, Philippines - Usa ka drayber sa motorsiklo kinsa milihay sa check point sa kapolisan kay nahadlok nga hidakpan kay wala siya'y lisensya sa pagmaneho, nakadasmag og taxi ug nadakpan gyud hinuon didto sa Paz Beach, sa barangay Cansojong, dakbayan sa Talisay sa miaging gabii.

Wala lang ibutyag ang ngalan sa dinakpan kay usa siya ka menor de edad unya kompiyansa kaayong mimaneho og motorsiklo.

Apan ang drayber sa taxi nga nadasmagan ginganlan lang og Garry Cabilan, 38, nga taga Cansojong ug CATZ taxi ang iyang gidala nga may plakang GXD- 630.

Base sa police blotter sa Talisay, kini nagbutyag nga ang motorsiklong gimaneho sa usa ka batan-on, nagtangag sa plakang 7TC-G-8955 giingong nagbaguros gikan sa barangay Tanke paingon ngadto sa barangay Cansojong.

Apan sa pagtan-aw sa batan-on nga may mga kapolisan nga nag-checkpoint misuway kini og likay sa paningkamot nga dili hidakpan, apan naunsa bang pagkaunsaa nga sa tanto niyang paningkamot nga dili maapsan sa naggukod nga mga polis, nahadasmag man siya sa taxi ni Cabilan nga gi-parking niadtong tungora didto sa daplin sa karsada sa Cansojong.

Karon hayahay kaayo siyang nag-atubang sa dakong problema kay gawas nga dakpunon siya kay nagmanehong wala'y lisensya, nakadasmag pa gyud og taxi.

Ang mga tigpaniid nagkanayon nga susama ra kini sa panultihon nga nagkanayon, imbis naglikay sa baga didto na gyud hinuon sa kayong nagdilaab mahapunta’; ug usa kini ka leksyon sa mga tawong bisan wala'y lisensya mamugos gyud sa pagpadagan og sakyanang de motor. – BANAT NEWS