Crips gang mibawos, usa namatay

CEBU, Philippines - Namatay ang usa ka batan-ong gituohang miyembro sa Bloods gang human kini gikaligoan og bala sa usa ka batan-ong giingong sakop sa karibal nga grupong Crips gang kagahapon sa kaadlawon diha sa dalan F. Jaca sitio Tugac barangay Inayawan.

Ang suspek nga nasikop sa kapolisan miangkong panimalos ug ‘tripping’ lang ang iyang gihimo ngadto sa biktimang si Jeko Kent Tumulak Rosalita, 20, molupyo sa maong lugar nga gituohang miyembro sa Bloods Gang.

Giangkon ni Jeffrey Laspoña, 22, taga barangay Pardo nga siya maoy lider sa mga batan-ong miyembro sa Crips gang diha sa maong barangay, gipangita pa sa kapolisan ang laing tulo niini ka kauban nga miapil sa maong krimen.

Usa ka saksi (pangalan gitago sa Banat News) nagkanayon nga samtang nagpaabot siya og masakyan nasigpatan niya ang biktima uban sa usa ka babaye gikan nanggawas sa San Roque chapel dihang kalit kining giduol sa duha ka batan-on ug gitiunan og armas hinungdan nga midagan ang biktima ug ang babaye padulong sa dalan F. Jaca.

Apan gikatahong kalit nga gipusil sa suspek ang duha, gikatahong miapil usab ang kauban ni Laspoña pagpusil sa biktima hinungdan sa pagkaigo niini upat ka higayon diha sa ulo ug sa likod.

Samtang ang mga suspetsado daling misibat human sa hitabo padulong sa Sunrise Road samtang si Carlito, amahan sa biktima pagkasayod sa nahitabo mao nay miadto ug midala sa anak ngadto sa Cebu City Medical Center apan pipila ka minutos ang milabay nakabsan kini sa kinabuhi.

Sa gihimong hot pursuit operation sa kapolisan, nadakpan si Laspoña diha sa ilang panimalay ug nakuhaan og kalibre .357 rebolber nga may lima ka buhing bala sa kalibre .38. Samtang sa crime scene nakuha usab ang usa ka kabhang sa kalibre .38 rebolber ug usa ka deformed slug.

Si PO3 Geoffrey Gutual sa Homicide Section mibutyag sa Banat News nga ilang pagduda nanimalos lang ang mga suspetsado ngadto sa grupo sa biktima human usa sa mga sakop sa Crips gang ang gipatay sa sakop usab sa Bloods niadtong milabay'ng gabii diha sa South Road sa Poblacion barangay Pardo.

“Tripping-tripping lang ‘to amoa ug agi’g bawos sa among kauban nga gipusil sad nila,” matud pang Laspoña dihang gihinabi sa mga tigbalita diha sa buhatan sa Homicide Section.

Padayon pa karong gisubay sa kapolisan ang ubang kauban sa suspetsado nga nakaikyas. – BANAT NEWS