2 ka lalaki, 1 babaye nakuhaa'g armas, drugas

CEBU, Philippines - Nakuhaan og drugas ug armas ang tulo ka tawo atol sa gihimong pagpangronda sa mga sakop sa IDMB ug Intelligence Section sa kapolisan sa Mandaue sa milabay’ng gabii sa barangay Looc. Ang nasikop mao sila siCarmelo Ontal, 43, Fernando Paller, 49, taga Riverside barangay Hipodromo dakbayan sa Sugbo ug Theresa Maria Dungog, 23, taga Tres Rosas barangay Alang-alang.

Matud pa ni SPO1 Kerwin Bejer sa IDMB alas-7 sa milabay’ng gabii ilang gironda ang panimalay ni Ontal pinaagi sa search warrant nga giluwatan ni Mandaue MTCC Branch 2 Executive Judge Carlos Fernando sa kasong paghupot sa armas nga walay lisensiya.

Atol sa pagkasikop ni Ontal nakuha ang usa ka kalibre 38 nga adunay tulo ka buhing bala ug mga kagamitan sa pagsuyop og shabu. Sa maong operasyon kalit nga mitawag si Paller ngadto ni Ontal apan si Insp. Ramil Morpos ang hepe sa IDMB na ang mitubag sa cellphone ni Ontal.

Nasuta nga naghisgot kini og delivery sa mga shabu nga giorder niini, hinungdan nga giandam sa intelligence section ang buybust diha sa dalan San Antonio sa barangay Cambaro, si Paller ug Dungog miabot aron ihatud ang drugas ug nasulod sa laang ug nakuhaan og pito ka pinutos sa gituohang shabu nga nagkantidad og P1,500 matag usa lakip na ang marked money nga duha ka P500.

Si Dungog nga uban ni Paller misuway pagdagan apan nasignit gihapon kini ug sa pagrekisa nakuhaan kini og kalibre 38 sa iyang posesyon sa mga sakop ni Insp. Zosimo Jabas sa Intelligence.   (Bong Soriano ug Romeo Limpangog)    (BANATNEWS)