Dasmag motor vs bus driver angol

CEBU, Philippines - Naangol ang drayber sa motorsiklo human kini modasmag sa bus pasahero-an sa crossing sa may highway sa barangay San Vicente, siyudad sa Bogo niadtong Huwebes sa buntag.

Ang biktima mao si Jimmy Andreno, 48, minyo, nga taga barangay Gairan, Bogo, samtang ang drayber sa Autobus nga gidasmagan sa biktima mao si Longakit Casimero, 58 , minyo, nga taga Ward-1 Poblacion, lungsod sa Minglanilla.

Si PO3 George Ocena sa Bogo City Traffic Division mibutyag sa  Banat News  nga gikan pa sa Bogo bus terminal ang Autobus ug paingon sa siyudad sa Sugbo dihang pag-abot niini sa maong lugar kalit lang midasmag sa bumper sa sakyanan ang motorsiklo sa biktima.

Tungod kay walay helmet imbis bumper maoy malumping, ang ulo na hinuon sa biktima napantok sa simod sa bus ug naantog usab sa sementadong karsada ang iyang dagway .

Ang biktima gihatod dayon sa tambalanan sa dakbayan sa Sugbo samtang ang driver sa Autobus boluntaryong mitahan sa iyang kaugalingon sa buhatan sa kapolisan sa Bogo. - Darrel A. Carumba