CEBU, Philippines - Pangitaan og pamaagi ni Bokal Victor Maambong nga mahunong na ang panagribal ug maghiusa ang duha ka fraternity– ang Alpha Kappa Rho (Akrho) ug Tau Gamma Phi – alang sa kalinaw ug aron usab mausab ang pagtan-aw sa publiko diha kanila.
Si Maambong, kinsa modagan sa pagkamayor sa umaabot nga piniliay diha sa lungsod sa Consolacion mipatawag sa gibana-banang 600 ka mga lider ug mga miyembro sa maong grupo ug gipresentar kanila ang iyang plataporma kun mapiling mayor sa lungsod. Si Maambong kinsa naa na sa ikatulong termino isip bokal sa sixto distrito nagkanayon nga mapalambo pa ang relasyon sa duha kun dunay kooperasyon sa usa’g-usa.
Buot karon ni Maambong nga hatagan og responsibilidad ang mga fraternitities sa lungsod aron usab sila mahimong may papel sa katilingban.
“They have never been recognized in the community,” matud pa ni Maambong.
Gibutyag ni Maambong nga ang maong mga grupo mipasalig nga moabag sa mga kalihukan sa gobiyerno pinaagi sa mga feeding, clean and green projects ilabi na diha sa Barangay Jugan ug Pulpogan.
Sumala pa ni Maambong nga sa pagkakaron, bugtong ang kadautan lang ang nakita sa publiko sa imahe sa mga fraternities.
“We can never say that they are menace to the society. We see their potentials,” sa iyang kaugalingong panglantaw, gani ang duha ka grupo mihimo na og joint feeding program sa maong lungsod ug buot karong mahitabo ni Maambong nga mapailawom sila og mga seminars alang sa pangabuhian karong mosunod nga mga bulan. - Gary Lao ug Edwin Ian Melecio (BANAT NEWS)