Presyo sa Asukar gi-monitor sa DTI-7

CEBU, Philippines - Gilakip sa pag-monitor sa Department of Trade and Industry (DTI-7) ang presyo sa asukar dinhi sa rehiyon 7 nunot usab sa mga kabalaka nga mosulbong ang presyo niini nga maoy epekto sa nagkakusog usab nga panginahanglan niini.

Si Zaide Bation sa monitoring division sa DTI-7 miingon nga bisan kun ubos sa Sugar Regulatory Administration ang presyo sa asukar, apan ilang gilakip kini sa pag-monitor ang presyo sa asukar sanglit nalakip man usab sa naapektohan ang mga konsumedor.

Matud pa niya nga nagsugod pa sa bulan sa Agosto ang ilang pag-monitor sa mga presyo ug namatikdan nga taas kaayo ang demanda sa miaging bulan sa Disyembre.

Sa nasayran nga ang mga sakop sa Baker Association of the Philippines gibati og kabalaka nga ang padayon nga pagsaka sa presyo sa asukar maka-apekto usab ngadto sa pan de sal dinhi sa nasud. Si Manny Montalban sa nahisgotang kahugpongan miingon nga 85 sa pan dinhi sa nasud naggamit og asukar ug dako usab ang kahigayonan nga mousbaw ang presyo niini kun mosaka ang presyo sa asukar.

Hinuon iyang gitataw nga dili usab mahimo nga ilang ipatuman ang pagpa-usbaw sa presyo sa pan dinhi sa nasud sanglit gibati usab nila ang kabalaka nga mo-epekto usab kini sa ilang patigayon. - Romeo T. Limpangog (BANAT NEWS)