Negosyante gibanhigan patay

CEBU, Philippines - Namatay ang usa ka negosyante human kini banhigi sa wala mailhing tawo kagahapon sa kaadlawon sa sitio San Rafael, barangay Tanke, dakbayan sa Talisay.

Ang namatay giila sa mga polis nga si Leonidis Yap Arrival, 48, tag-iya sa Cebu Septic Tank nga nahimutang sa Bayotas Extension, barangay Mambaling, dakbayan sa Sugbu apan ang grahe sa iyang mga sakyanan nahimutang sa sitio San Rafael.

Si Arrival kinsa nakaangkon og usa ka samad pinusilan sa iyang aping daling gidala sa iyang mga empleyado ngadto sa Cebu City Medical Center.

Si PO2 Epifanio Comedido uban kang PO1 Rusty Pelayo daling miresponde sa maong hitabo human sila makadawat og tawag gikan sa usa ka concerned citizen diha sa lugar nga nahitaboan.

Base sa imbestigasyon sa nahisgutang mga polis nga si Arrival uban sa iyang sekretaryo nga si Christopher Yu, 29, Ricardo Lucero, 45, ug Junabel Tangaro, 33, nga sakay sa Nissan Patrol niini nga nagtangag sa plakang GMV- 168 gikan sa grahean sa sitio San Rafael sa dihang usa ka wala mailhing tawo nga nagpasalipod sa koral nga kawayan kalit   namusil   sa biktima ug kalma kaayong milakaw human sa pamusil.

Si Arrival nahagbong sa iyang sakyanan human maigo sa bala.

Si Supt. Henry Biñas, hepe sa Talisay City Police Station nga nahinabi sa Banat News kagahapon nagkanayon nga gipaladman pa nila ang imbestigasyon sa maong hitabo aron masuta ang motibo niini.

Matud sa hepe nga ang maong insidente nasuta  nga planado apan dili matawag nga usa ka “professional” ang namusil.

Gituohan sa kapolisan nga ang kriminal duna kini personal nga kasuko kang Arrival.

Si Biñas midugang nga hangyuon nila ang mga paryente ni Arrival nga makig-ayuda ngadto kanila aron masikop ang namusil. – BANAT NEWS