Polis gitabangan, kritikal

CEBU, Philippines - Kritikal ang kahimtang sa usa ka polis human nakuyapan sa dihang napantok ang ulo sa semento samtang gitabangan og kulata sa upat ka mga hubog nga nasuko nga iyang gibadlong tungod kay nagdumili pagbayad sa ilang gipalit nga sigarilyo sa usa ka KTV bar didto sa Sitio Quasi, barangay Poblacion lungsod sa Tabuelan niadtong Miyerkules sa ala una sa kaadlawon.

Ang biktima mao si SPO1 Amelito Alcala, nadestino sa Tabuelan Police Station ug molupyo sa barangay Kinawahan sakop sa maong lungsod.

Samtang ang upat ka mga suspek nga nagtabang og kulata niya mao sila si Chabby Bitbit,40, ulitawo, molupyo sa barangay-I Tuburan, Junifer Coraraton, 37, minyo ug molupyo gihapon sa maong dapit, Miguel Dejano, 35, minyo, molupyo sa barangay Lunas, Asturias ug Ernesto Dura, 36, minyo ug molupyo sa Sitio Pajo, Poblacion Tabuelan.

Matud ni Insp. Florendo Fajardo, hepe sa Tabuelan Police Station sa dihang nahinabi sa Banat News ang mga suspek miabot sa ktv bar nga nakainom na daan dayon mi-order og sigarilyo bali og P60 apan sa dihang gipaningil sa tindira nagmagahi sila pagbayad.

Naatol nga diha sa maong KTV bar si SPO1 Alcala nga off duty niadtong higayona ug misumbong ang mga tindira hinungdan nga iyang gikomprontasi ang mga suspek pagbayad sa maong obligasyon apan nagdumili sila sa pagtuo nga usa ka polis si SPO1 Alcala hinungdan nga giawhag niya kini pag-uban sa estasyonan.

Subay sa inisyal nga imbestigasyon misakay og motorsiklo si SPO1 Alcala paingon sa estasyonan dayung nagsunod ang upat ka mga suspek sakay sa ilang awto nga Nissan Sentra ug pag-abot sa barracks ubos nga bahin sa headquarter mao nalay namat-an nila ni SPO1 Raymund Jogan ug PO3 Lunato Mata nga gitabangan og kulata si SPO1 Alcala ug nakit-an sa pipila ka saksi ang pagsukmag ni Dura ug nabarag ang biktima.

Matud pa misunod og sukmag si Coraraton ngadtong kang SPO1 Alcala ug maayong pagkaigo sa nawong ug nahagba ug maayong pagkapantok sa ulo sa semento ug nakuyapan diha diha.

Matud ni Insp. Fajardo milanat og 30 minutos wala gyud mauli-i sa panimuot ang biktima hinungdan nga gipadali niya kini og hatod sa Tuburan District Hospital.

Samtang dali siya nga mirespondi human napahibalo sa maong kagubot duol sa ilang police station ug naatol nga maoy iyang pag-abot sa dihang paingon na untang mosibat ang mga suspek hinungdan nga ila kining giti-onan ug gidala sa police station og gibalhug sa karsel.

Subay sa inisyal nga impormasiyon ni Insp. Fajardo gibalhin dayon sa Cebu Doctors Hospital dinhi sa dakbayan sa Sugbo si SPO1 Alcala dayon gibalhin kini sa Sacred Heart hospital. Ug subay sa inisyal nga resulta sa gipahigayong CT scan dunay gamay'ng crack ang ulo niini ug padayon pa kining gi-monitor sa mga doktor sa paghimo ning balita.Si Sr. Supt. Erson Digal, direktor sa kapolisan sa lalawigan sa Sugbo nagkanayon nga kasong direct assault with an agent of person in authority, ingon man frustrated murder ang ilang gipasaka sa Provincial Prosecutors Office kagahapong adlawa. – BANAT NEWS