PNP sa Mingla ipa-imbestigar

CEBU, Philippines - Mimando ang direktor sa Cebu Provincial Police Office nga ipaubos sa imbestigasyon ang kapolisan sa lungsod sa Minglanilla tungod sa kapakyas pagmentinar sa trapiko sa maong lungsod sa dihang miagi ang convoy ni Presidente Gloria Arroyo nga mitambong sa lubong ni anhing Press Secretary Cerge Remonde.

Si Sr. Supt. Erson Digal, hepe sa Cebu Provincial Police nagkanayon nga wala ang hepe sa Minglanilla nga si Insp. Leoncio Baliguat Jr. sa dihang miagi ang convoy, kini tungod kay nag-atiman kini sa iyang asawa nga nagbati niadtong tungora.

Apan matud pa ni Digal nga ang rason ni Baliguat dili ‘justifiable’ tungod kay ‘neglect of duty’ ang iyang gibuhat.

Si Digal nagkanayon nga kun mapamatud-an nga nagpabaya si Baliguat sa iyang trabaho, mohangyo siya sa buhatan sa Commission on Elections nga ibalhin kini sa laing estasyon.

Nasayran nga si PRO-7 Director Lani-O Neres   nasuko sa dihang nahiagi sa Minglanilla ang convoy sa presidente tungod sa kahuot sa trapiko.

Nasigpatan usab nga usa lang kabuok polis ang nagbarog sa maong lungsod aron pagmentinar sa trapiko.

Si Baliguat sa iyang bahin sa dihang nahinabi sa Banat News miangkon nga wala siya personal nakasuperbisar sa iyang mga tawo apan aduna siya'y deputy nga maoy iyang gihimangnoan aron maoy kasamtangang mopuli sa iyang lugar. – BANAT NEWS